Motion Speeches

吐露絃歌 四月開鑼(刊載於2019年3月27日《東周刊》)

       中文大學「吐露絃歌粵曲籌款晚會」又嚟啦!一眾中大粵曲發燒友,夥拍幾位粵劇名伶:譚倩紅、阮兆輝、王超群,將於四月九日(星期二)晚在沙田校園邵逸夫堂開鑼,為逸夫書院籌款。

       呢個一年一度嘅音樂會,中大與曲藝界同樣重視。幕後主力推手,大家都知道係逸夫書院院長陳志輝教授,佢同時係中大市場學系教授,兼 EMBA 主任,更有另一身份係香港著名嘅粵曲業餘唱家。「吐露絃歌」在多年耕耘之下,已成為不少顧曲周郎每年重要約會啦!

       我參與「吐露絃歌」演出多年,今次夫妻拍檔,演繹諧曲《幸運號碼》。上世紀五、六十年代,甚多創新破格之粵曲作品,精彩紛呈。有不少取材自小市民生活之諧趣歌曲,嘻笑怒罵、諷刺時弊,甚受歡迎。

       近年我從中尋寶,專搵啲有趣嘅諧曲,重新編成唱本,例如《釣魚郎》、《噱頭王》、《呃神騙鬼》等,利用不同嘅演出機會,推廣呢啲咁特別嘅歌曲,而《幸運號碼》乃其中少有以馬圈為題材之作。此曲為六十年代出品,徐子郎撰曲,男女丑生梁醒波、譚蘭卿合唱。

       內容述及梁趕往馬場賭馬,幾為譚駕駛之汽車撞倒,先而口角,繼而相識,相偕進入馬場。梁賭馬只靠貼士,不若譚對馬匹素有研究,結果譚連番報捷,梁則場場敗北。梁輸清欲離去,幾乎忘卻還有套票一張,譚提示下核對,果然得中,反輸為贏,遂聯袂慶功。

        此曲歌詞啜核,夾雜不少生活俚語、英語詞彙,加上當時嘅馬名、騎師名,反映當時馬圈實况,馬迷聽來,當更有共鳴!

立法會盧偉國議員 博士 工程師 (工程界)
Legislative Council Ir Dr Hon Lo Wai Kwok (Functional Constituency - Engineering)