Motion Speeches

城大新動物醫療中心(刊載於2019年4月3日《東周刊》)

       我在三月二十七日以董事局成員身份出席典禮,慶祝位於荔枝角道與欽州街交界嘅 CityU Veterinary Medical Centre 落成。現時位於旺角太平道嘅獸醫設施及團隊,好快會搬到新中心提供服務。

       中心佔地三萬三千平方呎,係亞洲最大嘅同類中心之一,設有二十二間診療室,九個手術室,先進嘅診症儀器包括 CT Scanner及動物留院設備,有香港人數最多嘅獸醫團隊,可以為動物提供七日二十四小時嘅全天候急診服務。

       香港城市大學嘅獸醫學院,有呢個醫療中心加上城大動物醫療檢驗中心相配合,可以提供最佳嘅獸醫教學與實務培訓,讚!我之前亦做過城大校董,在升格為大學嘅前四年及後四年,共做過八年,可算見證城大多年來的成長!

        講番獸醫學嘅重要性,不單在於醫治動物嘅疾病,亦係各種畜牧與動物飼養行業嘅關鍵,而且更與人類疾病防治大有關係,因為人類與動物嘅疾病有互相感染嘅機會。郭位校長力主創辦城大獸醫學院,經過不少艱難曲折,今天去到一個新嘅里程碑,衷心祝賀!

立法會盧偉國議員 博士 工程師 (工程界)
Legislative Council Ir Dr Hon Lo Wai Kwok (Functional Constituency - Engineering)