Motion Speeches

日本咖啡文化(刊載於2019年4月24日《《東周刊》》)

       日本雖然唔出產咖啡豆,但對烘焙及沖泡咖啡特別講究,所以我到日本公幹或旅遊,都喜歡蒲下日式咖啡店。

       日前趁清明假期長周末,我夫婦二人與一對自加拿大返香港嘅好友同遊日本關西賞櫻。第一日到奈良碰上櫻花祭,大飽眼福。第二日早上到訪奈良附近間KO:HI:KAN(珈琲館),雖然係連鎖店,但呢間特別精緻。沖泡咖啡、烘麵包及炒雞蛋,都係一個女仔搞掂。咖啡杯都先用滾水燙熱,已經抵讚。多士外面香脆、內裡鬆軟,炒蛋滑過「澳牛」;仲有個日式「薯仔沙律」,好傳統feel!至於佢沖嗰杯「炭火珈琲」,香口得嚟濃淡得宜,讚!

       日本人出名守時,外出訪客,通常都好早到,先喺附近飲杯咖啡,時候差不多先上去見客。多年來形成咖啡店大行其道,對咖啡亦愈來愈講究。

       老友Simon黃家和係咖啡大行家也,佢話日本人最愛咖啡,所以Blue Mountain「藍山咖啡」豆都俾佢哋搜羅晒。佢解釋話藍山咖啡源自牙買加,特性溫醇,咖啡因含量不高,一般烘焙至中度,可以保留咖啡嘅芬香。多年前,日本嘅咖啡公司如UCC及丸紅等已經喺牙買加收購咖啡場。目前超過八成半嘅藍山咖啡由日本人收購,造成壟斷。

       因其價格比一般咖啡豆高得多,因此有啲咖啡店就用「藍山風味」(Blue Mountain Style)之類嘅字眼,其實藍山豆嘅成分只約半成至一成。識飲嘅當然樂意破費,飲真正嘅藍山咖啡。我從Simon口中得悉點滴,已扮晒咖啡專家啦!而近年遊日我多咗一樣採購目標,就係咖啡豆囉!

立法會盧偉國議員 博士 工程師 (工程界)
Legislative Council Ir Dr Hon Lo Wai Kwok (Functional Constituency - Engineering)