Motion Speeches

長三角區域一體化發展(刊載於2019年5月1日《東周刊》)

       立法會四個事務委員會,從四月廿一日至廿四日,在長江三角洲地區進行為期四日嘅職務訪問。

       長三角地區係內地經濟發展最迅猛嘅地區之一,以競爭力及創新產業聞名。區內省市各具優勢,上海係物流及金融中心,浙江省及江蘇省係強大嘅生產基地,而安徽省亦有其文化特色。長三角喺創新科技、智慧城巿、文化藝術推廣等各方面都值得借鑑。今次立法會議員嘅職務訪問,有多名政策局局長隨行,不過原已報名參加嘅七名非建制派議員,卻以政治氣氛不適合為由退團,有啲可惜。

       行程重要活動之一,係「長三角區域一體化發展情況介紹會」,主要講者係上海市發改委馬春雷主任。上海市佔地六千多平方公里,常住人口二千四百多萬人,第三產業佔 GDP百分之六十九點九,製造業佔百分之二十六點六。日後目標維持製造業佔 GDP 四分之一,但當然要提升「智造能力」,發展高端製造業。上海嘅口岸貿易達一點二萬億元,佔全球百分之三點三,係全球第一位,而集裝箱吞吐量多年維持全球首位。上海市成功之道在於開放!外資企業對上海貢獻大,佔企業數目約百分之二,提供百分之二十就業及百分之二十七GDP。

       長三角區域一體化發展已提升至國家戰略。長三角包括上海市、江蘇省、浙江省、安徽省,共三省一市。以三十五點九萬平方公里土地,二點二億人口,達至二十一點二萬億元經濟總量。即佔全國六分一人口,約四分一生產總值。

        京津冀區域、長三角區域、粵港澳大灣區,各自形成強大嘅城市集群效應,亦各有優勢。未來發展,同樣充滿挑戰與機遇!

立法會盧偉國議員 博士 工程師 (工程界)
Legislative Council Ir Dr Hon Lo Wai Kwok (Functional Constituency - Engineering)