Motion Speeches

香園圍公路(刊載於2019年5月29日《東周刊》)

     「香園圍公路」於五月廿六日通車,即本文刊出時,駕駛人士已經可以行走呢條新界東北嘅重要新路。全條公路全長約十一公里,包括四點八公里長嘅「龍山隧道」及零點七公里長嘅「長山隧道」,連接「粉嶺公路」及興建中嘅「香園圍邊境管制站」,設有四個交匯處。全程不收費,行畢只需八分鐘,比較現時路線節省十六分鐘以上!

       五月廿一日上午,立法會工務小組安排委員趁未通車前,參觀香園圍公路相關工程設施。一行人登上龍山隧道南端嘅通風大樓遠眺,深感在繁忙嘅原有道路及鐵路上空進行咁複雜嘅工程,難度極高。我哋坐嘅車子從龍山隧道北行,有機會落車,喺呢條全港最長嘅陸上行車隧道步行!我哋去到香園圍口岸地盤前面,聽政府工程師們講解口岸設計、行車流向及未來跨境交通安排。目前口岸工程仍在進行中,估計年底完成。

        我住所離呢度唔係好遠,親身見證呢幾年喺咁大型嘅橋隧道路工程進行期間,附近道路雖然不斷有相應嘅臨時改動,但一直都保持行車暢順。本港工程人員嘅專業能力與心思,值得讚揚!

立法會盧偉國議員 博士 工程師 (工程界)
Legislative Council Ir Dr Hon Lo Wai Kwok (Functional Constituency - Engineering)