Motion Speeches

內地科技發展點滴談(刊載於2019年6月19日《東周刊》)

       中美貿易談判反反覆覆,而且美國更將戰線伸延至科技領域,對「華為」進行前所未見嘅全面打壓,企圖破壞其需求鏈與供應鏈。情況令人擔心,但同時亦引起不少港人留意內地科技嘅高速發展。我今日就以四月下旬「立法會長三角職務訪問」喺上海「張江科學城」所見所聞,同大家分享一下。

        張江科學城展示廳有「最強光、藍天夢、中國芯、創新藥」四個主題,即超強超短激光等光源嘅實驗,航空航天技術包括中國研發嘅C919民航機,芯片設計及圓晶製造,生物科技與新藥研究等四方面。展廳內容豐富,精采紛呈。九二年張江高科技園開園時,面積為十七平方公里,現今發展成為張江科學城,面積達九十五平方公里,成為綜合性國家科學中心,吸引甚多國內外高新科技企業進駐。目前匯聚企業一萬八千多家,實力強勁!

       張江高科技園區內有一個重要嘅科研中心:「國家蛋白質科學研究(上海)設施」,係綜合研究生命科學嘅先進體系。設施自一五年初對外開放,與國內外高校、科研單位以至企業合作,亦包括香港大學、香港中文大學及香港科技大學。呢個蛋白質科研中心嘅內部團隊與外部客戶,共取得大量研究成果,發表甚多重要論文,有助改善人類健康及生活質素。

       其實內地不同嘅科技板塊,包括長三角地區及粵港澳大灣區等,有甚多出色嘅科研機構,有機會再同大家分享。

立法會盧偉國議員 博士 工程師 (工程界)
Legislative Council Ir Dr Hon Lo Wai Kwok (Functional Constituency - Engineering)