Motion Speeches

內地科技發展點滴談(刊載於2019年6月26日《東周刊》)

        上周我講到長三角科技發展嘅點滴,亦提及粵港澳大灣區都有甚多出色嘅科研機構。我相信如果數大灣區成功科技企業,而研究成果係來自香港嘅,大家會即時想起「大疆創新科技」(DJI)及創辦人汪滔。

      ○五年,喺香港科技大學就讀嘅汪滔以遙控直升機嘅飛行控制系統作為畢業課題,研究嘅核心在於使航空模型機能夠自動在空中懸停。汪滔於○六年在香港科技大學宿舍成立大疆,然後在深圳開展業務,並成功在兩年後推出第一款直升機無人飛行控制系統。

       內地嘅無人機技術已發展到載人在天空飛行。去年四月香港立法會議員到大灣區考察,就專程到廣州參觀另一家飛行器公司。該企業專門研製智能無人機裝置及「自動駕駛載人飛行器」,過去多次喺大型活動上用數以百計嘅無人機,在高空展示圖案。至於試驗中嘅載人飛行器則分單人版及雙人版,乘客無須持有執照,全由調動中心控制飛行。

       參觀當日議員們都好有興趣親身試坐飛行器,包括金融服務界重量級議員張華峰,不過就並非真正飛升。當日該公司亦安排飛行器在無載人狀況下,作飛行示範。

       無人機商機無限,而觸發點原來係香港科技大學,港人應引以為傲。其實香港喺多個科研領域都達到國家級以至世界級水平。如何培養及吸引科研人才,並協助科研成果商品化、產業化,要靠政府推出更積極更創新嘅政策與措施。

立法會盧偉國議員 博士 工程師 (工程界)
Legislative Council Ir Dr Hon Lo Wai Kwok (Functional Constituency - Engineering)