Motion Speeches

SOPHIE 6s(刊載於2019年7月17日《東周刊》)

       今次呢個題目,一般讀者可能摸不着頭腦,其實SOPHIE 6s係IVE工程學科研發出嚟嘅最新版太陽能車。IVE即「香港專業教育學院」,係「職業訓練局」(VTC)嘅機構成員,致力為各行各業培訓人才,而轄下嘅七個學科中以工程學科最具規模。

       IVE喺○九年成立太陽能車隊,目標在於推廣可再生能源及環保運輸。在師生通力合作及業界支持之下,應用各種科技,在第二年推出首架太陽能車SOPHIE 1。其後不斷改良提升,並參加國際大賽,吸收經驗。參與嘅同學薪火相傳,將經驗傳予師弟妹,不斷進步。一七年發展到第六代SOPHIE 6,並出征澳洲長途賽事。該賽事全程三千公里,橫越南北澳洲,車隊要奮戰六日。結果面對來自不同國家與地區嘅高性能太陽能車,SOPHIE 6勇奪殿軍!

       IVE工程喺今年七月六日舉行「SOPHIE 6s」嘅發布及誓師大會,讓呢架新車公開亮相。今次新版本最大突破之處在於將剎車系統嘅部分組件,包括剎車碟與剎車卡鉗,與摩打系統合而為一,以達至進一步「輕量化」及「微型化」。加上採用咗效能更高嘅「永磁同步電機」,效率高達百分之九十六。呢架升級版太陽能車將出戰十月於澳洲舉行嘅「世界太陽能車挑戰賽2019」,期待再創佳績!

立法會盧偉國議員 博士 工程師 (工程界)
Legislative Council Ir Dr Hon Lo Wai Kwok (Functional Constituency - Engineering)