Motion Speeches

鐵路設施,不容破壞(刊載於2019年9月18日《東周刊》)

      由反對逃犯條例修訂而引發嘅示威行動,近日暴力愈發升級,已嚴重影響市民生活。

      八月三十一日喺灣仔有兩幕情景特別令人觸目驚心:喺軒尼詩道嘅縱火行為,及喺灣仔地鐵站嘅破壞玻璃幕門及路軌。軒尼詩道嘅縱火,大火橫跨整條馬路,火舌高達五層樓!可幸最後大火被消防員奮力撲熄,否則該區大廈林立,火警一旦蔓延,不堪設想。投擲汽油彈、縱火嘅行為,不僅危害到執法者,亦威脅到市民嘅生命財產!

       八月三十一日灣仔地鐵站嘅玻璃幕門被人打爛後,有人拋擲鐵架及雜物到路軌上。不幸地,其後機場鐵路同樣出現破壞情況!亦有人將單車拋在東鐵架空電纜上,幸好鐵路工作人員在列車服務開動前及時發現並清除。香港鐵路運作非常繁忙,一列接一列,破壞路軌嘅行為可能造成非常嚴重嘅事故,市民一定要對咁無法無天嘅違法行為說不!

       暴力示威者對港鐵車站設施嘅破壞愈來愈嚴重,入閘機、購票機、顯示屏、閉路電視等都係破壞對象,真係睇到心痛夾眼火爆!升降機不能運作,輪椅人士、行動不便嘅長者,如何出入車站?

       呢啲設施都係工程師與好多人努力共同建成,利民便民,而且根本就係市民嘅資產, 家竟然被聲稱追求民主自由嘅示威者用暴力破壞,真係好大嘅諷刺!

       感謝港鐵同事與維修團隊深夜搶修,短時間內重開被破壞嘅車站,保證服務。不過完全復修喺咁短時間內真係唔可能,例如入閘設施只能局部開放。

       我有日見到港鐵負責維修管理嘅工程師,佢係維修經理,呢輪都晚晚冇得瞓。我請佢向團隊致謝致敬!

立法會盧偉國議員 博士 工程師 (工程界)
Legislative Council Ir Dr Hon Lo Wai Kwok (Functional Constituency - Engineering)