Motion Speeches

淨化海港計劃(刊載於2019年11月27日《東周刊》)

       上一期我講香港嘅渠務工程,反應唔錯,咁今次特別講下渠務署其中最大型,亦真係世界級嘅污水收集處理工程,就係「淨化海港計劃」。

       香港自開埠以來,人口不斷增長,以致維多利亞港愈來愈污染,連始於○六年嘅渡海泳,都被迫喺七八年停辦。

       政府痛定思痛,決定進行大型嘅環保基建工程,淨化海港。第一期工程於二十五年前,即九四年展開,目標係收集及處理從九龍及港島東部產生嘅污水。工程包括建造昂船洲污水處理廠,建造近二十四公里嘅污水隧道網絡,喺昂船洲西南面建造排放隧道及擴散器管道,並為九龍及港島東部七間基本污水處理廠進行改善工程。工程喺○一年十二月投入服務,解決咗維港兩岸大約百分之七十五嘅污水處理工作。

       第二期甲工程則在○九年開展,目標喺解決其餘百分之二十五嘅污水處理任務,覆蓋範圍包括港島北及西南地區。工程包括興建全長二十一公里嘅深層污水隧道,提升與擴充昂船洲污水處理廠,及改善八個污水處理廠嘅設施。第二期甲工程喺一五年十二月投入服務,當時我都應邀為開幕大會主禮哩!

      「淨化海港計劃」第一期加上第二期甲嘅總污水處理量,共達每日二百四十五萬立方米,可以為維港兩岸十個地區,最多五百七十萬人口提供污水處理服務。一度嚴重污染嘅維港因而回復潔淨,泳灘重開。渡海泳亦於八年前復辦,兩年前就重返維港中部比賽。

       「淨化海港計劃」嘅技術與規模都係世界級嘅,屢獲國際大獎,包括喺去年獲頒第十五屆「中國土木工程詹天佑獎」。香港嘅基建成就,抵讚!

立法會盧偉國議員 博士 工程師 (工程界)
Legislative Council Ir Dr Hon Lo Wai Kwok (Functional Constituency - Engineering)