Motion Speeches

為U型隔氣注水(刊載於2020年2月5日《東周刊》)

       本文執筆之日嘅上午,立法會「衞生事務委員會」召開特別會議,討論香港預防及控制「新型冠狀病毒」感染嘅措施。會上最多人問口罩供應問題。希望呢篇文章出街嘅時候,口罩供應已經改善,否則市民點抗疫?

       我喺會上提問兩點,第一點我問有關前線醫護人員隔離住宿嘅妥善安排。我特別向站在防疫前線嘅醫護人員致敬,同時關注政府嘅支援。唔少前線醫護要接觸染上疫症嘅病人或懷疑染病人士,基於防疫需要下班後與家人分隔。我要求政府提供更好嘅地方讓醫護人員得到充分休息。

       第二點我指出抗疫不單止靠戴口罩,家居安全衞生亦非常重要。○三年沙士有慘痛教訓,當時喺淘大花園就有病毒經排水渠傳入家居,起因係排水排污系統當中有啲「U型隔氣」未有注水,令病毒擴散入室內,導致社區爆發。

       其實U型隔氣好普遍,水盤、馬桶、浴缸都有嘅。而其他型式嘅P型、S型、樽型,與U型都一樣,係利用管道中間U型嘅部分儲滿水,於是室內與室外就分隔咗,外邊管道嘅氣味唔會倒流室內,而昆蟲老鼠亦因為有水分隔,唔能夠潛入室內。一般嚟講,常用嘅水盤、馬桶、浴缸自然有水留喺隔氣度,但廚房、洗手間地面去水口,或其他地台嘅去水口,未必有水沖到,咁就要特別定時喺渠口注水,最好係一比九十九嘅稀釋漂白水。

       吸收咗沙士嘅慘痛教訓,政府當年特別檢視大廈嘅排水渠設計,但時間耐咗,市民可能忘記。面對肺炎疫症,政府必須大力宣傳,指導市民為U型隔氣適時注水,避免乾枯。

立法會盧偉國議員 博士 工程師 (工程界)
Legislative Council Ir Dr Hon Lo Wai Kwok (Functional Constituency - Engineering)