Motion Speeches

支援畢業生就業(刊載於2020年5月6日《東周刊》)

        新冠肺炎疫情打擊本港就業市場,有統計顯示,今年首季大學畢業生職位大減四成,就業形勢比較○三年「沙士」時更嚴峻。本港最新失業率進一步上升至近十年高位,達百分之四點二。今年首季畢業生嘅職位空缺只有約一萬二千個,按年大減近四成,畢業生搵工困難!

       報道亦提及「數碼港」今年因應疫情舉行網絡招聘會,提供約八百五十個職位空缺,至今收到過萬份申請,即係大約十二人爭一個職位。今年企業招聘策略更趨保守,但係科技相關人才需求仍然殷切。

       本港唔少行業都有為畢業生提供培訓計劃,其中「香港工程師學會」就有名為「A計劃」嘅實習工程師培訓制度,由工程公司招聘工科畢業生,在專業人士督導之下,進行為期二十四個月嘅培訓。其中十八個月到不同嘅部門見習,而最後六個月就選擇一個崗位作定點訓練。完成培訓,再加幾年實際工作經驗,就可以考取工程師學會正式會員資格,走上專業道路。喺現行制度之下,公司可以為實習生申請「職業訓練局」每月五千多元嘅薪酬補貼,共十八個月。

       我向政務司司長、發展局局長、勞福局局長提出,應該大幅增加呢項職訓局資助嘅名額,加上如果「保就業」計劃再幫到呢啲實習生,咁對工程公司繼續安排培訓,聘請實習工程師,會有實質幫助。幾位官員嘅回應都好積極,我希望可以盡快落實。

       以上係具體幫助畢業生就業嘅例子,其他行業亦需要類似嘅支援。我呼籲政府與業界力保呢啲生力軍嘅就業,喺經濟下行壓力中,為畢業生提供適當嘅入職培訓機會,繼續為各行各業培養接班人!

立法會盧偉國議員 博士 工程師 (工程界)
Legislative Council Ir Dr Hon Lo Wai Kwok (Functional Constituency - Engineering)