Motion Speeches

新鐵路項目大落後(刊載於2020年6月24日《東周刊》)

        財委會日前通過增加沙中線工程撥款,市民希望呢個重要嘅鐵路項目盡快完工,全面通車。另一方面,隨着高鐵香港段通車、沙中線餘下工程進入尾聲,香港目前已冇新嘅大型鐵路工程。而政府在六年前公報《鐵路發展策略二○一四》之後,竟然一直無動靜!拖延多年,剛剛先至有東涌線延線、屯門南延線兩項拍板。

       我非常關注鐵路工程青黃不接嘅問題,因為鐵路發展關乎民生,而多年來亦為香港培訓咗好多工程人才,包括鐵路規劃、設計、建造、營運等領域嘅專才。我要求政府確保《鐵路發展策略二○一四》餘下嘅五項鐵路項目盡快上馬,既惠及民生,亦避免工作斷纜,以免工程人才白白流失!

        呢五項就係北環線及古洞站、洪水橋站、新東九龍線、南港島線(西段)、北港島線。其中北環線計劃連接東鐵線及西鐵線,喺新界北部形成一個環狀網絡,可以改善新界北部嘅東西連接,有效疏導東鐵線嘅客流量。同時,東鐵線落馬洲支線增設古洞站,以配合古洞北新市鎮嘅發展計劃,服務新界北部嘅新發展區。北環線原定喺一八年動工,二三年落成通車,現時已大幅落後於原計劃。事實上,古洞北、粉嶺北新發展區嘅土地基建工程已經開展咗,但係北環線及古洞站工程仍未正式啟動,令人費解。

        另一項要配合新界發展嘅鐵路工程就係洪水橋站。原計劃喺西鐵線天水圍站至兆康站路段之間增設洪水橋站,以服務未來嘅洪水橋新發展區,配合該區嘅人口增長及商貿發展。原本預計於二一年動工,二四年落成啟用。洪水橋發展所需嘅基建工程將要開展,但鐵路工程又係落後咗好多啦!

立法會盧偉國議員 博士 工程師 (工程界)
Legislative Council Ir Dr Hon Lo Wai Kwok (Functional Constituency - Engineering)