Motion Speeches

工程撥款 惠及經濟民生(刊載於2020年7月1日《東周刊》)

       六月二十四日,我主持工務小組本年度最後一次會議,多達十三個項目,第一項係繼續討論與機場三跑系統相關嘅警務及政府部門設施。大家都知道,喺現時政治氣氛之下,涉及三跑建設,會引起爭議,而涉及警方嘅設施,更會被反對派無限上綱。所以排喺後面嘅項目,睇白無乜機會輪得到,負責項目嘅政府同事都好擔心,因為今屆如果未能處理,到下屆立法會就要重新走程序,再到事務委員會解畫,然後再去工務小組、財委會,拖延好耐。

       三跑嘅警務及政府設施項目審議到尾聲,有泛民議員動議中止,還幸中止不獲通過,最終通過撥款。其後嘅議程中,龍鼓灘填海研究有爭議性,其他項目似乎都得到各方支持。為求通過多啲工程,我接納委員提議,即場諮詢政府代表,並得到同意抽起龍鼓灘項目。結果其他議程在加時期間全部通過!接近兩個半小時會議,通過咗十二個議程項目,共涉及一百九十八億元,將盡快提交財委會,希望趕得及批款。全年總結,工程小組共審議提交咗八百三十六億元工程撥款申請。

       六月二十六日,財委會上下午都開會,通過多項撥款,包括合共三百一十五億元嘅五個工程項目,其中有二百三十億係醫院工程。

       目前本年度財委會通過嘅工程項目,合共一千三百五十億。上年度及本年度工務小組通過提交財委會嘅新工程項目,仍然有大約四百六十億未獲正式批撥。希望喺七月中本屆會期完結前,財委會能夠盡量通過撥款,既可改善民生,亦保障業界生計,有助提振經濟!

立法會盧偉國議員 博士 工程師 (工程界)
Legislative Council Ir Dr Hon Lo Wai Kwok (Functional Constituency - Engineering)